Інфармацыйна-прапагандысцкая група наведала “Смаргоньгаз”

 16 студзеня інфармацыйна-прапагандысцкая група, якую ўзначальвае старшыня раённага Савета дэпутатаў Сяргей Кудзеньчук, сустрэлася з працоўным калектывам “Смаргоньгазу”.

З інфармацыяй аб становішчы спраў на рынку працы Рэспублікі Беларусь выступіла начальнік упраўлення па працы, занятасці і сацыяльнай абароне райвыканкама Зоя Крачкоўская. Яна адзначыла, што сітуауцыя з занятасцю насельніцтва станоўчая як у цэлым па краіне, так і ў нашым раёне. 

Што датычыць апошняга, то на аднаго беспрацоўнага прыходзіцца амаль 8 вакансій. На ўліку ў мясцовай службе занятасці стаіць невялікая колькасць людзей, якія не маюць работу. З іх пераважная большасць – мужчыны. Ім прапаноўваюцца перанавучанне, вакантныя працоўныя месцы на прадпрыемствах і ў арганізацыях, адкрыццё ўласнай справы з прадастаўленнем для гэтага субсідый. Вялікая ўвага надаецца стварэнню ў раёне новых працоўных месцаў.

Начальнік аддзела архітэктуры і будаўніцтва райвыканкама Дзяніс Крыштопенка  паведаміў аб тым, дзе ў нашым горадзе выконваюцца рамонтна-будаўнічыя работы. 

У прыватнасці, ён назваў праспект Індустрыяльны, вуліцу Асланава, некалькі шматпавярховых дамоў па вуліцы. Савецкай, каля якіх выконваецца мадэрнізацыя дваровай тэрыторыі. Прадаўжаецца рэканструкцыя басейна, якую плануецца закончыць вясною. Будаўнікі ўзводзяць шматпавярховыя жылыя дамы па вул. Камсамольскай і ў мікрараёне Усходнім.